Платон казаў: "Калі шавец будзе дрэнным майстрам, то дзяржава ад гэтага не пацерпіць, а вось калі грамадзян будуць выхоўваць дрэнныя, недасведчаныя настаўнікі, то мы пацерпім ад гэтага ўсе". Дык ці можа быць непрэстыжнай прафесія настаўніка?

     Сёння ўзняцце прэстыжу прафесіі настаўніка тэма даволі актуальная. З мёртвай кропкі яна ўжо зрушылася. Многія маладыя людзі ўсвядомлена спыняюць свой выбар на педагагічных спецыяльнасцях. Аднак па-ранейшаму неабходна раскрываць перад старшакласнікамі вялікі сэнс настаўніцкай справы, тлумачыць, што быць педагогам – гэта не толькі даваць веды падрастаючаму пакаленню, але і вучыць разуменню свету, усведамленню маральных кашьтоўнасцей, выхоўваць асобу.

     Настаўнік – прафесія творчая і надзвычай складаная. Каб навучыць чамусьці іншых, трэба, па-першае, ведаць чаму вучыць, па-другое, здолець данесці свае веды. Важна змагчы пераканаць вучняў, што школьны прадмет ім сапраўды патрэбны (жыццёвы вопыт паказвае, што так яно і ёсць на самой справе).